Untitled Document
Suusercup 4.-5.10.2008

[zurück]

 

Suusercup! Wie chömmä mir eigentlig do drzu?Dä isch doch gar nid bi eus ufem Terminkaländer.D'Nicole het eus drzu in Zug verführt,eusi Frauä z'bittä eus grad nomol ä Wuchäänd frei z'geh,dass mir ebä a dä Suusercup chönnä goh.Nach em Ja-Wort vo eusnä Familiä han mir den grad no meh SCPler motiviert zum mitmachä,so als Vorbereitung für Kaiseraugst.Und siehe da!Wo mir nach Wingreis abbogä si,si mir plötzlig 4 SCP Piratä hinder änander gsi d'Poetic,d'Freya ,d'Panic und d'Magic,das het mis Härzli grad höcher lo schlo.Nach afänglichä Schwierigkeitä,mit findä vom Clubhuus und wo parkierä,hän mir eus denn dra gmacht d'Boot uf z'stellä.Mit ä chli Hilf,hei denn eusi "Erschtling"d'Freya doch so wit gha,dass dr Mascht gstandä isch und sie hän schlussändlig sogar gwüsst für was as mä jedes Schötli cha bruchä.Nachdäm denn so lagsam alli 10 Piratä itrudlet si,isch es denn gli losgangä.Mir hän am Nomittag 3 Läuf chönnä seglä.Bi gutem,draiendem Wind und Bojelagä,wo mä sich eifach het müssä apassä und z'bescht druss machä.Wieder zrugg im Häfä hän mir denn no anerä Bootstaufi dörfä teilne.Im Felix Wüst si Pirat isch uf dr Namä "Bandita" tauft wordä,d'Esther het ä paar nätti Wort drzu gseit und mir hän denn das Boot mit Champis kräftig begossä.Nachem gmeinsamä z'Nachtässä im warmä Clubhuus,si mir fascht vollzählig nach Ligerz ans Wyfescht gfahrä.Dört si mir durch Ligerz gässlet und hän denn spöter alli ä Plätzli i eim vo denä wunderschönä Chäller gfundä,wo mä denn gmütlig zämä gsässä isch und trinkbari Schnäps (Namä han i doch vergässä) innerlich und üsserlich teschtet het.Nach dr Zämäkunft vo allnä Feschtbsucher het mä sich denn ins "Rusel"(Häuschen am See) verschoben.Wo denn alli ihres Nachtquartier bezogä gha hän,isch glaubi gli Ruh gsi?Dr Roland und ich hän im Auto gschlofä,drum channi das nid richtig beurteilä.Am Morgä,wo mir denn ufgstandä sind,hets uf einzelnä Perseningä Is gha,mehr bruchi zur Temperatur nid sägä,aber dä Super Zopf vo dr Esther und dr Kaffi het alles loh vergässä.Zrugg bi dä Boot hän mir eus langsam parat gmacht,will ä paar gmeint hei es git doch nid soviel hüt,aber s'uslaufä het sich glohnt.Wo Boje gsetzt gsi sind,isch es denn losgangä mit em erschtä Start am Sunntig,wider bi gutem Wind.Dä isch im Lauf vo dr Zyt immer stärker und stärker wordä,bim letschtä Spikurs vor em Ziel,si mir mit gutem Speed nur ä so uf dä Wällä dähi grauscht,wie seit mä das so schön,es isch "mega kuul" gsi,wieder ä neui Erfahrig meh für mi Stürmaa!Trotz allem Spass wo mir gha hän,si mir froh gsi,dass d'Wettfahrtleitig beschlossä het keini Läuf meh z'machä.Dank derä Entscheidig bin ich drfür in Gnuss cho dä Bricht dörfä z'schriebä.Nachdäm alles verpackt und Rangverkündigung verbi gsi isch,hän mir eus denn ä chli wehmütig uf ä Heimwäg gmacht.No ä letschtä Blick uf di verschneitä Alpä und dr glizerndi See,das isch ä Ablick wo eus Rhysegler immer wieder ä Tränli in d'Augä bringt.
Es isch ä witer's gfreuts Wuchäänd in dr Piratäfamiliä gsi. Dankä!

Sui 520 Dani und Roland